Dráp Niflunga.
Gvnnarr oc Hꜹgni toco þa gvllit alt, Fafniss arf. Ofriþr var þa i milli Givcunga oc Atla; kendi hann Givkvngom vold vm andlat Brynhildar. Þat var til setta, at þeir scyldo gipta hanom Gvðrvno, oc gafo henne ominnisveíg at drecca, aþr hon iatti at giptaz Atla. Synir Atla voro þeir Erpr oc Eitill; enn Svanhildr var Sigvrþar dottir oc Gvðrvnar. Atli konvngr bꜹþ heim Gvnnari oc Hꜹgna oc sendi Vinga eþa Knefrꜹþ. Gvðrvn vissi velar oc sendi m rv́nom orð, at þeir scyldo eigi koma, oc til iartegna sendi hon Hꜹgna hringinn Andvaranꜹ́t oc knytti i vargshár. Gvnnarr hafþi bedit Oddrvnar systvr Atla oc gat eigi; þa fecc hann Glꜹmvarar, enn Hꜹgni atti Kostbero; þeirra synir váro þeir Solarr oc Snęvarr oc Giv́ki. Enn er Givkvngar komo til Atla, þa baþ Gvðrvn sono sina, at þeir bǫði Givkvngom lifs; enn þeir vildo eigi. Hiarta var scorit or Hꜹgna, enn Gvnnarr settr i ormgarð. Hann slo horpo oc svęfþi ormana, en nadra stacc hann til lifrar.