Oddrúnargrátr.
Heiþrecr het konvngr, dottir hans het Borgny. Vilmvndr het sa, er var friþill hennar. Hon matti eigi fǫða born, aþr til com Oddrvn Atla systir; hon hafþi verit vnnvsta Gvnnars Givcasonar. Vm þessa sꜹgo er her qveþit:
1



 5
Heyrþa ec segia
i sꜹgom fornom,
hve męr vm kom
til Mornalanz;
engi matti
fyr iorþ ofan
Heiþrecs dottvr
hialpir vinna.
2



 5
Þat fra Oddrvn
Atla systir,
at sv męr hafþi
miclar sóttir;
brá hon af stalli
stiornbitloþom
oc a svartan
sꜹþvl of lagdi.
3



 5



 9
Let hon mar fara
moldueg slettan,
vnz at hári com
hꜹll standandi;
svipti hon sꜹþli
af svongom ió,
oc hon inn vm gecc
endlangan sal,
oc hon þat orda
allz fyrst vm qvaþ:
4




 5
„Hvat er fręgst
a foldo,
a hvat er hléz
Hvnalanz?“
Ambott qvaþ:
„Her liggr Borgny
of borin verkiom,
vina þin, Oddrvn!
vittv, ef þv hialpir.“

5
Oddrvn qvaþ:
„Hverr hefir vísir
vamms vm leitað,
hvi ero Borgnyiar
braþar sóttir?“

6



 5
Ambott qvaþ:
„Vilmvndr heitir
vinr hꜹcstalda,
hann varþi mey
varmri blęio
fimm vetr alla,
sva hon sinn fꜹdvr leyndi.“
7



 5
Þęr hycc męlto
þvigit fleira,
gecc mild fyr kne
meyio at sitia;
rict gól Oddrvn,
rammt gól Oddrvn
bitra galdra
at Borgnyio.
8



 5
Knatti męr oc mꜹgr
moldveg sporna,
born þꜹ in bliþo
viþ bana Hꜹgna;
þat nam at męla
męr fiorsivka,
sva at hon ecci qvaþ
orþ iþ fyrra:
9



 5
„Sva hialpi þer
hollar vettir,
Frigg oc Freyia
oc fleiri goð,
sem þv feldir mer
fár af hondom!“

10



 5



 9
Oddrvn qvaþ:
„Hnecaþ ec af þvi
til hialpar þer,
at þv verir þess
[verþ] aldregi;
het ec oc efndac,
er ec hinig męlta,
at ec hvivetna
hialpa scyldac,
þa er ꜹþlingar
arfi scipto.“

11



 5
Borgny qvaþ:
Ǫr ertv, Oddrv́n!
oc ø̨rvita,
er þv mer af fári
flest orþ of qvaþ;
enn ec fylgdac þer
a fiorgynio,
sem viþ brǫþrom tveim
of bornar vęrim.“

12



 5
Oddrvn qvaþ:
„Man ec, hvat þv
męltir enn vm aptan,
þa er ec Gvnnari
gerþag drecco;
slics dǫmi qvaðattv
siþan mundo
meyio verþa
nema mer einni.“
13 Þa nam at setiaz
sorgmóð kona,
at telia bꜹl
af trega stórvm:
14



 5
„Var ec vp alin
i iofra sal
— flestr fagnaþi —
at fira ráþi;
vnþa ec aldri
oc eign fꜹþvr
fimm vetr eína,
sva at minn faþir lifði.
15



 5
Þat nam at męla
mal iþ efsta
sia moþr konvngr,
adr hann sylti:
mic baþ hann gęða
gulli rꜹþo
oc svþr gefa
syni Grimildar.
16



 5
Enn hann Brynhildi
bað hialm geta,
hana qvað hann oscmey
verþa scyldo;
qvaþa hann ina ǫþræ
alna myndo
mey i heimi,
nema miotvðr spillti.
17



 5
Brynhildr i bv́ri
borða racþi,
hafþi hon lyði
oc lond vm sic;
iorþ dvsaþi
oc vphiminn,
þa er bani Fafniss
borg vm þatti.
18



 5
Þa var vig uegit
volsco sverþi
oc borg brotin,
sv er Brynhildr atti;
vara langt af þvi,
heldr válitið,
nnz þęr vęlar
vissi allar.
19



 5
Þess let hon harðar
hefndir verþa,
sva at ver ꜹll hofom
ęrnar rꜹ́nir;
þat mvn a hꜹlða
hvert land fara,
er hon let sveltaz
at Sigvrþi.
20 Enn ec Gvnnari
gatc at vnna
bꜹga deili,
sem Brynhildr scyldi.
21



 5
Bvðo þeir árla
bꜹga rꜹþa
oc brǫþr minom
bętr osmár;
bꜹþ hann enn við mer
bv fimtán,
hliþfarm Grana,
ef hann hafa vildi.
22



 5
Enn Atli qvaz
eigi vilia
mvnd aldregi
at megi Givca;
þeygi viþ máttom
viþ mvnom vinna,
nema ec helt hꜹfði
viþ hringbrota.
23



 5
Męlto margir
minir niðiar,
qvoþvz ocr hafa
orþit bø̨þi;
enn mic Atli qvaþ
eigi myndo
lyþi raþa
ne lꜹst gora.
24 Enn slics scyli
synia aldri
maþr fyr annan,
þar er mvnvþ deilir.
25



 5
Sendi Atli
áro sina
vm myrcvan viþ
mín at freista;
oc þeir qvomo þar,
ęr þeir coma ne scyldoþ,
þa er breiddo viþ
blęio eina.
26



 5
Bvðo viþ þegnom
bꜹga rꜹþa,
at þeir eigi
til Atla segði;
enn þeir hvatliga
heim scvndoðo
oc óliga
Atla sꜹgðo.
27 Enn þeir Gvðrvno
gorla leyndo þvi,
at hon heldr vita
halfo scyldi.
28



 5
Hlymr var at heyra
hofgvllinna,
þa er i garð riþo
Giv́ca arfar;
þeir or Hꜹgna
hiarto scaro,
enn i ormgarð
annan lꜹgþo.
29



 5



 9
Var ec enn farin
eino sinni
til Geirmvndar
gorva dryckio;
nam horscr konvngr
hꜹrpo sveigia,
þviat hann hvgdi mic
til hialpar ser
kynricr konvngr
of koma mvndo.
30



 5
Nam ec at heyra
or Hlésseyio,
hve þar af striþom
strengir gvllo;
baþ ec ambáttir
bvnar verþa,
vilda ec fylcis
fiorvi biarga.
31 Létom fliota
far svnd yfir,
vnz ec alla sac
Atla garþa.
32



 5
Þa com in arma
ut scęvandi
moþir Atla,
hon scyli morna!
oc Gvnnari
gróf til hiarta,
sva at ec mattigac
mǫrom biarga.
33



 5
Opt vndromc þat,
hvi ec eptir mác,
linnvengiss bil!
lifi halda;
er ec ognhvotom
vnna þottvmz
sverþa deili,
sem sialfri mer.
34



 5
Sattv oc hlyddir,
meþan ec sagþac þer
morg ill vm scꜹp
min oc þeirra;
maþr hverr lifir
at mvnom sinom.“
Nv ęr vm genginn
gratr Oddrvnar.