Skírnismál eða För Skírnis.
Freyr sonr Niarþar hafði einn dag setzc i Hliþscialf oc sa vm heima alla; hann sa i iotvnheima oc sa þar mey fagra, þa er hon gecc fra scala fꜹðvr sins til scemmo; þar af fecc hann hvgsottir miclar. Scírnir het scósveinn Freys; Niorþr baþ hann qveþia Frey mals. Þa męlti Scaði:
1  4	„Ristv nv, Scirnir! oc gacc [sciótt] at beida occarn mala mavg, oc þess at fregna, hveim enn froþi se ofręiþi afi.“
2  4	Scirnir qvaþ: „Illra orþa er mer ón at ykrom syni, ef ec geng at męla viþ mꜹg, oc þess at fregna, hveim enn froþi se ofręiþi afi.“
3  4	Scirnir qvaþ: „Segðv mer þat, Freyr, folcvaldi goða! oc ec vilia vita: hvi þv einn sitr endlanga sali, minn drottinn! vm daga?“
4  4	Freyr qvaþ: „Hvi vm segiac þer, seggr enn vngi! mikinn móðtrega? þviat alfrꜹþvll lysir um alla daga oc þeygi at minom mvnom.“
5  4	Scirnir qvaþ: „Mvni þína hycca ec sva micla vera, at þv mer, seggr! ne segir; þviat vngir saman varom i árdaga, vel męttim tvęir trv́asc.“
6  4	Freyr qvaþ: „I Gymis gꜹrþom ec sa ganga mer tiþa mey; armar lysto, en af þaþan alt lopt oc lꜹgr.
7  4	Męr er mer tiðari manni hveim vngom i árdaga; asa oc alfa þat vill engi maþr at viþ samt sém.“
8  4	Scirnir qvaþ: „Mar gefðv mer þa þann er mic vm myrcqvan beri visan vafrloga, oc þat sverþ, er sialft vegiz viþ iotna ętt.“
9  4	Freyr qvaþ: „Mar ec þer þann gef, er þic vm myrcqvan berr visan vafrloga, oc þat sverþ, er sialft mvn vegaz, ef sa er horscr, er hefir.“
10  5	Scirnir męlti viþ hestinn: „Myrct er v́ti, mal qveþ ec ocr fara vrig fioll yfir, þvrsa þioþ yfir; baþir viþ comvmc, eþa ocr bada tecr sa inn amatki iotvnn.“
Scirnir reíþ i iotvnheima til Gymiss garða. Þar varo hvndar ólmir oc bvndnir fyr sciþgards hlidi, þess er vm sal Gerðar var. Hann reiþ at þar er fehirþir sat a hꜹgi oc qvaddi hann:
11  4	„Segðv þat, hirþir! er þv a hꜹgi sitr oc vardar alla vega: hve ec at andspilli komvmc ens vnga mans fyr greyiom Gymis?“
12  4	Hirþir qvaþ: „Hvart ertv feigr eþa ertv framgenginn .   .   .   .   .   .   .   . ? andspillis vanr þv scalt ę vera godrar meyiar Gymiss.“
13  4	Scirnir qvaþ: „Kostir ’ro betri heldr enn at klꜹcqva se hveim er fv́ss er fara; eino dǫgri mer var aldr vm scapaþr oc alt lif vm lagið.“
14  4	Gerðr qvaþ: „Hvat er þat hlym hlymia, er ec heyri nv til ossom rꜹnnom i? iorþ bifaz, enn allir fyr scialfa garðar Gymis.“
15	Ambatt qvaþ: „Maþr er her vti stiginn af mars baci, ió letr til iardar taca.“
16  4	Gerðr qvaþ: „Inn biþþv hann ganga i occarn sal oc drecca inn męra mioþ! þo ec hitt óvmc, at her vti se minn broðvrbani.
17  4	Hvat er þat alfa ne asa sona ne víssa vana? hvi þv einn vm komt ęikinn fv́r yfir ór salkynni at sia?“
18  4	Scirnir qvaþ: „Emkat ec alfa ne ása sona ne víssa vana; þo ec einn vm komc eikinn fv́r yfir ydor salkynni at siá.
19  4	Epli ellifo her hefi ec algvllin, þꜹ mvn ec þer, Gerþr! gefa, friþ at cꜹpa, at þv þer Frey qveðir oleiðastan lifa.“
20  4	Gerðr qvaþ: „Epli ellifo ec þigg aldregi at mannzcis mvnom; ne viþ Freyr, meþan occart fior lifir, byggiom bęði saman.“
21  4	Scirnir qvaþ: „Bꜹg ec þer þa gef þann er brendr var meþ vngom Oþins syni; atta ero iafnhꜹfgir, er af driv́pa ena nivndo hveria nótt.“
22  4	Gerðr qvaþ: „Bꜹ́g ec þiccac, þot brendr se meþ vngom Odins syni; era mer gvllz vant i gꜹrþom Gymis, at deila fe fꜹþvr.“
23  4	Scirnir qvaþ: „Sér þv þenna męki, męr! miofan, málfán, er ec hefi i hendi her? hꜹfvþ hꜹggva ec mvn þer halsi af, nema þv mer sętt segir.“
24  4	Gerðr qvaþ: „Ánꜹð þola ec vil aldregi at mannzciss mvnom; þo ec hins get, ef iþ Gymir finniz vígs otrꜹþir, at ycr vega tíði.“
25  4	Scirnir qvaþ: „Ser þv þenna męki, męr! miofan, málfán, er ec hefi i hendi her? fyr þessom eggiom hnigr sa inn aldni iotvnn, verþr þinn feigr faþir.
26  4	Tamsvendi ec þic drep, enn ec þic temia mvn, męr! at minom mvnom; þar scaltv ganga, er þic gvmna synir siþan eva se.
27  4	Ara þvfo a scaltv ár sitia, horva heimi ór, snvgga heliar til; matr se þer meirr leiþr, enn manna hveim enn fráni ormr meþ fírom.
28  4	At vndrsionom þv verþir, er þv vt kǫmr, a þic Hrimnir hari, a þic hotvętna stari; víðkvnnari þv verþir, enn vorþr meþ goðom; gapi þv grindom fra.
29  4	Tópi oc ópi, tiꜹsvll oc oþoli, vaxi þer tár meþ trega; seztv niþr, enn ec mvn segia þer svaran svsbreca oc tvennan trega.
30  4	Tramar gneypa þic scolo gerstan dag iotna gꜹrþom i; til hrimþvrsa hallar þv scalt hverian dag kranga kostalꜹ́s, kranga kostavon; grát at gamni scaltv i gogn hafa oc leiða meþ tarom trega.
31  4	Męþ þvrsi þrihꜹfþvþom þv scalt ę nara eþa verlꜹ́s vera; þitt ged gripi, þic morn morni; verþv sem þistill, sa er var þrvnginn i ꜹnn ofanverþa.
32  4	Til holtz ec gecc oc til hrás viðar, gambantein at geta, gambantein ec gat.
33  4	Reiþr er þer Oþinn, reiþr er þer Asabragr, þic scal Freyr fiásc, en fyrinilla męr! en þv fengit hefir gambanreiþi goða.
34  4	Heyri iotnar, heyri hrimþvrsar, synir Svttvnga, sialfir asliþar, hve ec fyr byð, hve ec fyrir banna manna glavm mani, manna nyt mani.
35  4	Hrimgrimnir heitir þvrs, er þic hafa scal fyr nagrindr neþan; þar þer vílmegir a viþar rotom geita hland gefi. Ǫþri dryccia fa þv aldregi, męr! af þinom mvnom, męr! at minom mvnom.
36  4	Þvrs ríst ec þer oc þria stafi: ergi oc ęþi oc oþola; sva ec þat af ríst, sem ec þat a reist, ef goraz þarfar þess.“
37  4	Gerðr qvaþ: „Heill verþv nv heldr, sveinn! oc tac viþ hrímcálki fvllom forns miaþar; þo hafþa ec þat etlad, at myndac aldregi vnna vaningia vel.“
38  4	Scirnir qvaþ: „Ǫrindi mín vil ec ꜹll vita, aðr ec riþa heim heþan: nęr þv a þingi mvnt enom þrosca nenna Niarþar syni.“
39  4	Gerðr qvaþ: „Barri heitir, er viþ bęði vitom, lvndr lognfara; enn ept nętr nío þar mvn Niarþar syni Gerþr vnna gamans.“
Þa reiþ Scirnir heim; Freyr stoð v́ti oc qvaddi hann oc spvrþi tiþinda:
40  4	„Segþv mer þat, Scirnir! aþr þv verpir sꜹdli af mar oc þv stígir feti framarr: hvat þv arnaþir i iotvnheima þins eþa mins mvnar?“
41  4	Scirnir qvaþ: „Barri heitir, er viþ báðir vitom, lvndr lognfara; enn ept nętr nío þar mvn Niarþar syni Gerþr vnna gamans.“
42  4	Freyr qvaþ: „Lꜹng er nott, langar ’ro tvęr, hve vm þreyiac þriár? opt mer manaþr minni þotti, enn sia half hynótt.“